İsrail qüvvələri 1973-cü ildən sonra ilk dəfə Suriya ərazilərinə daxil olub

İsrail qüvvələri Suriya ərazilərinə irəliləyib.

1news.az xəbər verir ki, bu barədə "The New York Times" İsrail rəsmilərinə istinad edərək məlumat yayıb.

Bildirilib ki, rəsmilər İsrailin hava qüvvələrinin həftə sonu Suriya dövlətinin hərbi obyektlərini də vurduğunu təsdiqləyiblər.

Həmin hərbi obyektlərin "müxaliflərin" əlinə keçməsinin İsrail üçün təhlükə təşkil etdiyini bildirən rəsmilər, vurulan hədəflər arasında kiçik kimyəvi silah anbarları, radar təchizatlı batareyalar, Rusiya istehsalı hava hücumundan müdafiə sistemləri və Skad raketlərinin olduğunu qeyd ediblər.

İsrail rəsmiləri, İsrail qüvvələrinin Qolan yüksəkliklərindəki tampon zonanı keçərək 1973-cü ildən sonra ilk dəfə Suriya ərazilərinə daxil olduğunu bildirib.

İsrail Baş naziri Benyamin Netanyahu dünən işğal altında saxladıqları Qolan yüksəkliklərindəki tampon zonanı "ələ keçirmələri" üçün orduya tapşırıq verildiyini söyləmişdi.

Həmçinin, İsrail dövlət televiziyası KAN-ın xəbərində İsrail ordusunun işğal altındakı Qolan yüksəkliklərinin Suriya tərəfində yerləşən Şeyx dağına nəzarəti ələ keçirdiyini təsdiqlədiyi vurğulanıb.

İsrail 1967-ci ildən Suriya ərazisi olan Qolan yüksəkliklərini işğal altında saxlayır. 1974-cü ildə İsrail və Suriya arasında imzalanan Qoşunların Çıxarılması Sazişi ilə tampon zonanın və silahsızlaşdırılmış ərazinin sərhədləri müəyyən edilmişdi.