Ölkəmizdə IV Azərbaycan Vokalçıları Festivalı keçiriləcək
20-24 dekabr tarixlərində ölkəmizdə vokal sənətinin əsl bayramı – IV Azərbaycan Vokalçıları Festivalı keçiriləcək.
1news.az xəbər verir ki, Festival, Azərbaycan Respublikasının Mədəniyyət Nazirliyinin dəstəyi, Azərbaycan Dövlət Akademik Opera və Balet Teatrı və Bülbül Vokal Məktəbinin təşkilatçılığı ilə baş tutacaq.
Bu möhtəşəm layihə çərçivəsində zəngin və çoxşaxəli tədbirlər planlaşdırılıb: Azərbaycan Milli Konservatoriyası müəllim və tələbələrinin iştirakı ilə konsert və elmi seminar; Xalq artisti Şahlar Quliyevin əziz xatirəsinə həsr olunmuş konsert; Fikrət Əmirov adına Gəncə Dövlət Filarmoniyasında Xalq artisti Sevinc İbrahimovanın solo konserti; Kamera musiqisi axşamı, Rus bəstəkarlarının ariya və romanslarından ibarət gecə.
Festivalın təntənəli bağlanış mərasimi 24 dekabr tarixində Müslüm Maqomayev adına Azərbaycan Dövlət Akademik Filarmoniyasında baş tutacaq. Tədbir Azərbaycan vokal sənətinin parlaq simalarını bir araya gətirərək tamaşaçılara unudulmaz anlar bəxş edəcək.
