Vüsal Xəlilov: 2024-cü ildə nağdsız ödənişlərdə 66 faiz artım müşahidə edilib
“2024-cü ildə Azərbaycanda kartlarla aparılan nağdsız ödənişlərdə 66 faiz artım baş verib” .
1news.az xəbər verir ki ki, bunu Bakıda keçirilən VIII Beynəlxalq Bankçılıq Forumunxa Mərkəzi Bankın baş direktoru Vüsal Xəlilov deyib.
O, bildirib ki, bu müsbət inkişaf, ödəniş xidmətləri və ödəniş sistemləri haqqında qəbul olunmuş yeni qanunlarla əlaqəlidir.
“Bu qanunlar bazarın şəffaflığını və rəqabət qabiliyyətini artıraraq istehlakçılara daha əlverişli xidmətlər təqdim edir.
Hal-hazırda 14 elektron pul təşkilatı, 8 ödəniş təşkilatı və 1 ödəniş operatoru Mərkəzi Bank tərəfindən lisenziya alıb. Bu proses təşkilatların dayanıqlılığını artıraraq, vətəndaşların və ümumilikdə maliyyə sektorunun maraqlarının qorunmasını təmin edir. Mərkəzi Bankın tətbiq etdiyi xüsusi tənzimləmə rejimi innovativ maliyyə həllərinin bazara təhlükəsiz şəkildə təqdim olunmasına şərait yaradır.
“Açıq bankçılıq və açıq maliyyə təşəbbüsü ilə banklar, finteklər və istehlakçılar üçün yeni imkanlar yaranır” - deyə V.Xəlilov əlavə edib:
“Banklar bu yeni yanaşmadan daha çox faydalana biləcək təşkilatlardandır, çünki onların texniki imkanları daha genişdir. Bir neçə bank artıq bu texnologiyaları tam şəkildə tətbiq etməyə hazırdır və digər banklar da yaxın zamanda bu istiqamətdə irəliləyəcəklər.
Bu inkişaflar, Azərbaycan maliyyə sektorunun gələcəyini daha dayanıqlı və rəqabət qabiliyyətli edəcəkdir. Banklar, finteklər, tənzimləyicilər və istehlakçılar arasında qurulan harmonik əməkdaşlıq sektorda müsbət dəyişikliklərə gətirib çıxarır”.
