Muxtar Babayev: İqlim dəyişikliyi ilə mübarizədə turizmin önəmli rolu var
"Azərbaycan COP29-da hökumətlərdən və beynəlxalq təşkilatlardan tutmuş yerli icmalara, bizneslərə, gənclərə və vətəndaş cəmiyyətinə qədər bütün maraqlı tərəflərin səslərini əks etdirməyə çalışmışdır”.
1news.az xəbər verir ki, bunu COP29 çərçivəsində Turizm sektorunda Təkmilləşdirilmiş İqlim Fəaliyyəti üzrə Nazirlərin Birinci Görüşündə COP29-un Prezidenti, ekologiya və təbii sərvətlər naziri Muxtar Babayev deyib.
Muxtar Babayev bildirib ki, COP29 sədrliyi iqlim böhranının həlli üçün müxtəlif sektorlarda güclü səylər göstərilməsini zəruri hesab edərək, iqlim fəaliyyətinə vahid və çoxtərəfli yanaşmanı tətbiq edib: “Bu yanaşma bizim Fəaliyyət Gündəliyimizin əsasını təşkil edir və iqlim fəaliyyətini milli, regional və qlobal səviyyələrdə hərtərəfli əhatə etmək üçün işlər görülüb”.
O, vurğulayıb ki, turizm sektoru çox vaxt lazımi dəyəri görməsə də, iqlim dəyişikliyinə qarşı mübarizədə böyük potensiala malikdir: “Bu günü turizmə həsr etməklə, biz bu mühüm sektorda iqlim problemlərinin həllinə doğru bir addım atırıq. Turizm dünya miqyasında geniş yayılmış sahələrdən biridir. Kiçik ada dövlətləri və inkişaf etməkdə olan ölkələr üçün turizm həyati gəlir və məşğulluq mənbəyidir. Digər tərəfdən, turizm sektoru nəqliyyat, yerləşdirmə və resurs tələb edən fəaliyyətlər nəticəsində qlobal istixana qazı emissiyalarının əhəmiyyətli bir hissəsinə səbəb olur və iqlim dəyişikliyinin təsirinə həssasdır”.
Foto: Nadir İbrahimli
