“Bilirdim ki, bütün bunlar təsadüfi deyil...” - Bir dayçanın təsirli hekayəsi - VİDEO
“Mənim adım Prospero (Uğur)dur. 14 iyun 2023-cü ildə Bakı şəhərində anadan oldum.
Mən tək gözlü dayçayam. Anam tövlədəki ən gözəl madyandır, adı Şantaldır, atam - qüvvətli Kareras isə bütün atlar arasında ən çox hörmət ediləndir. Valideynlərim konkur üzrə çempiondurlar! Əslində gözəl doğulmalı və əsl idmançıya çevrilməli idim və mən də dünyaya gəldim... Bir gün anamla gəzərkən dəhşətli bir hadisə baş verdi... Gözümə bir şey dəydi və ondan sonra bir gözümü itirdim. Beləliklə, uzun müddət adı olmayan tək gözlü bir dayça oldum... ta ki, bir gün O gələnə qədər... Onun kim olduğunu və niyə mənə bu qədər qəribə baxdığını bilmirdim, amma yanaqlarından aşağı axan su damcılarını görürdüm...”.
Gözünü itirmiş dayçadan mənə danışdıqlarında əsl ağrını hiss etdim, nə qədər qəribə səslənsə də, analıq hissiyatı kimi idi. Ola bilsin ki, çoxları bunun qeyri-mümkün olduğunu, bunun insan təbiətinin qanunlarına zidd olduğunu düşünəcək, amma mən sadəcə olaraq mənim üçün ən “təhlükəli” vəziyyətin yaranmasına səbəb olan qəribə vəziyyətin tərifini sözlə tapmağa çalışıram. Beynimə yansıyan düşüncə: “O mənim ola bilər...” idi.
Bütün bu heyrətamiz hekayə Yeni il ərəfəsində baş verdi. Məni tövləyə dəvət etdilər və dəvəti böyük məmnuniyyətlə qəbul etdim, çünki atlara qarşı həmişə mənim xüsusi sevgim olub. Təəssüf ki, at sürmə zamanı baş vermiş kədərli hadisə səbəbindən bu gün atçılıq idmanı ilə məşğul olmağa imkan verməyən onurğa sütunundan zədə aldım, lakin bu gözəl heyvanın kürəyini yenidən hiss etmək və ağır nəfəsini eşitmək fürsətini ürəyimdən heç vaxt atmadım.
Deməli, bu tövlədə bizim dayçamızın başına gələn faciəni, nəticədə onun gözünü itirdiyini öyrəndim. Bu heyrətamiz məkanın sahibi, mehriban və qayğıkeş Natiq bəy heyvana kömək etmək üçün əlindən gələni etsə də, gözü xilas etmək mümkün olmadı... Bir neçə gündən sonra körpəni görmək üçün yenidən atların yanına qayıdanda Natiq bəy sanki fikirlərimi oxuyurmuşcasına üzünü mənə çevirdi: “Bilirəm, şikəst atı verməzlər, amma sizin bu dayçaya baxışlarınızı görəndə başa düşürəm ki, bu qismətdir." O, işçiləri çağırıb, ayğırın adını soruşdu. Məlum oldu ki, körpənin adı yoxdur... “Qismətdi” deyə təkrarladı. "Ona bir ad ver və sənə uğur gətirsin!" dedi.
Həmin axşam evə qayıdanda anladım ki, həyatımda yeni birisi peyda oldu, onun üçün məsuliyyət daşımalı və onun üçün vicdanım və mənə kiçik-böyük möcüzə bəxş edən Uca Tanrı qarşısında cavab verməli olacağam. Axı həyatda hər şey güzgüdür, həm baxdığımız, həm də bizə baxan hər bir şey. Mən dayçaya Uğur (Prospero) adını verdim, ona uzun və xoş tale arzuladım ki, o, sevgi və diqqətdən məhrum olmasın, bəlkə də hər birimizin sayəsində dünyanın ən məşhur atına çevrilsin, şikəstliyinə baxmayaraq. Bu gündən etibarən mən və yaxın dostlarım Uğurun sosial şəbəkələrdə şəxsi səhifəsini açırıq ki, bu hekayə ilə maraqlanan hər bir insan gələcəkdə tək gözlü bir dayçanın güclü və sağlam bir ata çevrilməsinin bir parçası ola bilsin! Bizim sizinlə Uğura qarşı olan iştirakımız, sevgimiz və diqqətimiz əsl mərhəmət, sevgi və şəfqət nümunəsinə çevrilə bilər. Qoy bu dayça ümidin və yaxşılığın simvolu, əzab və ağrının üzərində isə əsl qələbə olsun.
Şiddətli müharibələr, itirilmiş mənalar və ölməkdə olan təbiət dünyasında hər birimiz bu müdafiəyə ehtiyacı olanlar üçün canlı qəyyum və qoruyucu ola bilərik.
Uğurun sadə olmayan taleyini istisnasız olaraq hər kəs onun İnstaqram, eləcə də Tiktok-dakı səhifəsinə abunə olmaqla izləyə biləcək.
Əminəm ki, Uğur onunla maraqlanan hər kəsə uğurlar gətirəcək. Ziyarətinizi səbirsizliklə gözləyirik, əziz dostlar!
Müəllif: Nigar Həsən-zadə
